viernes, 26 de abril de 2013

Rufus Harley

Son munchos años yá usando youtube pa buscar material gaitísticu interesante. Sabiendo qué buscar, suelen apaecer coses bien interesantes. Sicasí, tengo que dicir que nunca quedé tan claváu al asientu como al atopar esti documentu tan tremendu. Ya tenía noticies de Mr. Harley, gracies a un CD d'elli que me pasara el mio profesor de flauta va bien d'años, pero nun atendí bien pa lo que me contó y pensé qu'el puntu entamara a tocar en feches muncho más recientes. Nun me llamó muncho l'atención el jazz fusión d'aquel discu concretu.

De lo que yo nun taba enteráu ye que Harley yá tocaba... ¡nos años 60! y que amás yera afroamericanu (y con ascendencia cherokee). Amás, lo qu'aparez nesta grabación ye jazz tradicional, puru y ensin concesiones. Lo dicho, llevé un sorpresón.

Trátase d'un fragmentu del show de Steve Allen "I've got a secret" emitíu'l 17 d'ochobre de 1966. Los que nun sepáis inglés podéis pasar directamente al minutu 5:30


¿Qué vos paez? Yo nun soi quien a parar de velo. Esi feeling, esa actitú, esa comprensión profunda de la música que fai. Nun sé si dalguna vez na vida tocó un reel o un strathspey, pero da igual... Rufus Harley, ¡Gaiteru!

Un vistacín a la wikipedia y otres fontes proporciónanos información perinteresante. Traduzco un poco.

Rufus nació cerca de Raleigh, North Carolina, pero vivió dende guaje nun barriu probe de Philadelphia. Nel 63 vio pola tele el funeral del presidente Kennedy y al oyer a la banda gaites del reximientu escocés d'infantería Black Watch quedó enamoráu de la gaita. Ya sabía tocar varios instrumentos, pero en cuanto pudo fízose con una gaita nuna casa d'empeños de Nueva York.
 
Courage: The Atlantic Recordings
Rufus foi completamente autodidacta cola gaita. Tocaba con un estilu completamente propiu, ensin utilizar les ornamentaciones propies de la gaita escocesa (polo menos nel vidiu que acabamos de ver) y adaptando la téunica a les esixencies del jazz y el funk. Hasta garraba la gaita distinto.

Circula perehí una anécdota muy célebre de la so primera época como gaiteru. Tando elli ensayando en casa, dalgún vecín enfadáu llamaba a la policía, quexándose de que taben tocando la gaita. Rufus, al ver a los policíes llegar en coche, aparaba. Los axentes, al llegar y picá-y a la puerta, atopábense con Rufus, que-yos dicía: "vamos ver, ¿qué pasa, que tengo yo cara d'irlandés?". Conozse que los policíes quedaben cortaos, porque según el propiu Rufus el trucu funcionó-y munchu tiempu.

Harley foi un gran músicu multiinstrumentista, grabó munchos discos y actuó con otres grandes estrelles del jazz, como Coltrane, Gillespie, Dexter Gordon, Sonny Rollins o Herbie Mann. Experimentó con munchos tipos de músiques modernes, del hip-hop al  blues. Fizo milenta conciertos y xires. Tamién salió en programes de televisión y hasta tuvo un papelín nuna película de Coppola.

Scotch & Soul
Lo más emocionante ye que Rufus Harley tenía un discursu musical ya intelectual bien articuláu. Yera un idealista, un músicu ensin fronteres convencíu de que los músicos de jazz podíen ayudar a traer paz, harmonía y bon entendimientu al mundu. Yo quito'l sombreru. Artista.

jueves, 25 de abril de 2013

Jota de Fonteta - Alumnos de 1º y 2º

Esta ye la pieza que vamos trabayar nes clases de 1º y 2º de conxuntu el martes 30. Vais deprendela d'oreya y decidir sobre los adornos; depués vamos improvisar una segunda voz muy simple por terceres. Equí tenéis la partitura, pa que vos quede un material físicu (más bien virtual, a nun ser que la imprimáis) de lo que vamos ver en clase.

Trátase d'una jota de dos partes recoyía pol folclorista, cantaor y gaiteru Xosé Ambás (pincha nel link), que ye posiblemente la persona que más sabe de música tradicional y folclor n'Asturies. La informante foi Rolindes de Mosteiro, vecina del guapu pueblu de Fonteta, nel Valledor (Ayande).

Como esplica'l propiu Xosé Ambás nel llibretu del CD "Música Tradicional d'Ayande", utilizando la fala de la zona:
"Este é el son que conecía pá jota Rolindes de Mosteiro, de Fonteta. Tocábala un gueiteiro de Fonteta, de casa Cachete, y podían cantarse cuartetas na primeira parte; a segunda faíala a gaita, como nos dixo María, a fiya de Rolindes. É úa jota composta de dúas partes (...). Foi recoyida por Ambás el 7 de marzo del ano 2003".
Pinchando equí mismino podéis visitar el myspace del discu y escuchar el corte "Fonteta", interpretáu por Xosé Ambás, Dolfu R. Fernández y un servidor, Diego Pangua.

Y pinchando nesti link tenéis la partitura en pdf pa baxala con bona calidá.

Jota recoyía en Fonteta


Fonteta


El choqueiro, personaxe da comparsa guilandeira dos Reises, recuperada fai poucos anos en Fonteta, San Salvador y Vilalaín (El Valledor, Ayande). Más info nel blog de María del Roxo, del que ta sacada a foto.

Entamu

Entamar daqué ye siempre difícil, incluyendo un blog, pero esta vez tamos decidíos y ponémonos a ello con tol enfotu. Los oxetivos del blog son los siguientes:

A) Crear un cuelmu de recursos gaitísticos (partitures, audio, vídeos, exercicios, etc.)

B) Servir de vínculu entre profesores, alumnos y families d'alumnos.

C) Asoleyar  les producciones de los alumnos (trescripciones, interpretación, artículos, etc.).

Toi convencíu de la utilidá que va tener. Poro, ensin más preliminares, queda inauguráu En Ca'l Gaiteru. Afayáivos y que vos preste.

El Gaiteru Lliberdón en Londres, 1911