jueves, 30 de mayo de 2013

Смесено хоро

Entrada dedicada al gaiteru y fabricante de payueles Raúl García, de Barros. 


Petar Yanev (gaida) Valya Balkanska y Hristina Lyutova
13.05.2008, Boris Dimitrov
Si queremos ampliar el nuestru repertoriu y la nuestra cultura musical, ye una bona idea investigar n'otres músiques tradicionales. La mayoría de gaiteros asturianos aventurámonos col repertoriu foriatu al traviés de les músiques tradicionales de Galicia, Bretaña y les Islles Britániques; esto ye asina por cercanía xeográfica, por afinidá gaitera (tocamos gaites de tipu atlánticu) y pol movimientu cultural qu'esiste al rodiu del interceltismu, epitomizáu pol FIL de Lorient. De manera qu'acabamos tocando andros, reels, hornpipes, dañs plinn y foliadas a pastu, y yo inclúyome. Pero hai más músiques y más repertorios... y una fonte de repertoriu tradicional "exóticu" que pienso que ye interesantísima y a mí encántame ye la música balcánica, fundamentalmente la búlgara.

Los Balcanes
Nun ye casual que los que disfrutamos cola música d'Irlanda, Escocia o Bretaña acabemos averándonos a lo balcánico; grupos míticos del folk célticu como Planxty (Irlanda) o Kornog (Bretaña) y grandes solistes de gaita como Patrick Molard o Davy Spillane lleven munchu tiempu introduciendo temes d'esos países nos sos discos y conciertos, y esa influencia acabó llegando a Asturies. Efectivamente, el recursu a pieces de sonoridá balcánica dase tamién nel folk asturianu. Alcuérdome de mano del tema H.oro - Bau del primer discu de Felpeyu, por exemplu.

Falamos d'una música tradicional mui rica y enormemente diferente de la nuestra, polo que resulta arriquecedor enforma metese un poco con ella. Nuna entradina de blog nun puedo estendeme con esplicaciones téuniques, y amás soi un inorante na materia, pero recomiendo a tolos interesaos buscar en google el llibru "Bulgarian-Macedonian Folk Music", de Boris Kremenliev. 

Lo que más pue llamanos l'atención de la música búlgara, aparte de les escales y de la riqueza espresiva de la gaida, ye la bayura de ritmos coxos que tienen, tanto na música cantada como na instrumental, y tanto si ye pa escuchar como si ye pa baillar. Por exemplu, dellos bailes búlgaros: la Kréptaka ta en 11/16 (2+2+3+2+2); la Paidûshka ta en 5/16 (2+3); Ratchenitza y Povúrnato hóró tan en 7/16... Ye una gozada escuchar el virtuosismu de los intérpretes de kaval, gaida, vigulín, acurdión o clarinete tocando con esi aplomu nesos compases sumamente reviraos (polo menos pa mí).

Vamos escuchar unes melodíes instrumentales incluyíes nun discu del Misteriu de les Voces Búlgares (Le Mystère des Voix Bulgares), col títulu "Bulgarski Einicheski Melodii". Contrabaxu, acurdión, kaval, gaida y vigulín. Alucinante, nun tien desperdiciu:



Ta claro que la variedá de compases dá-y un interés grande a esti tipu de música. Y ye que col nuestru repertoriu "atlánticu", como vos cuntaba antes, enllenu de 2/4 y 6/8, agradezse muncho lo qu'aporten les piezes de los Balcanes.


Y agora, vamos al grano. El tema que vos propongo tocar ye Smeceno Horo. Nun conozo versiones tocaes con gaida (con "d"), pero ye un tema bien afayaízu pa la nuestra gaita, (con "t"). Ye una pieza que tocaba allá nos años 70 el grupu irlandés Planxty. A los cuerdistes Andy Irvine y Dónal Lunny tirába-yos muncho lo balcánico. El gran músicu Andy Irvine, particularmente, redondea siempre el so repertoriu de reels, jigs y cantares con unos cuantos horos o kopanitzas, llegando a facer auténtiques fusiones hiberno-tracias o appalacho-ilirias.

Escuchamos yá Smeceno Horo. A ver si pillais el compás a la primera.



Complicao, ¿non? Pero mui potente. El casu ye qu'esti Smeceno Horo en versión de Planxty convirtióse nun clásicu, y ye fácil atopar músicos del ámbitu intercélticu que sepan tocala. Nun ye raro escuchala nuna sesión de música irlandesa, y a los bouzoukistes en concreto suel gusta-yos muncho.

En realidá, nun sé si ye UN smeceno horo o un tema QUE SE LLAMA Smeceno Horo. Quiero decir, nun sé si los smeceno horos son un tipu de pieza (como decir una jota, por exemplu) o ye una pieza concreta. Atopo en Youtube un vidiu alternativu que parez confirmar la primera interpretación:



Ensin saber búlgaru, lo más informativo ye metese na páxina thesession.org y buscar la entrada de Smeceno Horo. Los usuarios d'esta web apurren datos interesantes. Enterámonos ehí de que'l tema podría tener llegao a Planxty d'una agrupación llamada Purvomaiskata Group. Tamién grabó esti tema la big band de Don Ellis, col nome "Bulgarian Bulge". Ah, y al parecer lo correcto sería "Smeseno", non "Smeceno".

Lo que me prestó muncho foi atopar una versión del tema sacada d'un vinilo llamáu "Folk Music from Bulgaria", subida a SoundCloud por Emmanuel Delahaye, cola grafía cirílica "Смесено хоро". Nun sé si los intérpretes son el mentáu Purvomaiskata o non; en tou casu, trátase d'unos intérpretes escelentes. Escuchamos Смесено хоро:



Déxovos por fin la partitura de la pieza. Ye la transcripción de Neil Barr que ta colgada en thesession.org. Neil Barr fae una trescripción perbona, thank you. Yo namás que la pasé a Do y cambié un par de cosines p'apuntar la mínima diferencia entre la versión de Planxty y la ¿orixinal? atopada en SoundCloud. Una d'elles ye la diferencia entre'l compás 3 y el 7. El 3 ye como lo toca Planxty, el 7 como lo toquen los búlgaros. Tamién hai un "La" negra (compás 6, p.ex.) que Planxty subdivide en dos corchees (Sib + La). Los pentagramas 1 y 3 seguiríen a Planxty; el 2 ya'l 4 a los búlgaros.

Descárgala en pdf pinchando equí


Garramos un punteru en Re, ponemos a sonar el tema de Planxty y ... hala, a tocar. Gran exerciciu de lectura y de técnica. Disfruten.

sábado, 18 de mayo de 2013

Pasucáis de Julio Álvarez - Trescripción: Enol García

Julio Álvarez Suárez
Julio Álvarez Suárez ye un gaiteru natural del conceyu d'Uviéu qu'emigró pa Venezuela con namái 10 años. Más tarde  instalóse en Barcelona. Ye un intérprete escelente con un repertoriu enormemente interesante. Amás ye un gran difusor de la música y la cultura d'Asturies, y Gaiteru Mayor de los centros asturianos de Caracas y Barcelona. Supe d'él por mio pa, Pedro Pangua, que lu conoció cuando taba poniendo clases precisamente nel C.A. de Barcelona. Tiempu más tarde, apaecieron en youtube dellos vidios nos que salen los dos tocando.
Julio conserva el toque vieyu pal baille a lo suelto y ye, como digo, muy finu técnicamente. Hasta onde yo sé nun tien grabaciones discográfiques feches, pero sería bona noticia que les ficiera porque tien munchu interés lo que toca y cómo lo toca. 
En youtube atópense, como vos dicía, dellos vidios d'elli. Nesti casu vamos centranos nun pasucáis perguapu que podéis escuchar a partir del segundu 3:20. Al tambor, Pedro Pangua.




La trescripción que podéis topar embaxo fízola Enol García. Enol, un gaiteru mui mozu nativu de la cuenca'l Nalón, ye alumnu de primer cursu de grau mediu de gaita nel Conservatoriu d'Uviéu. Entamó a tocar col mayestru llavianés Pablo Carrera, y ye miembru de la B.GG. Conceyu de Llangréu y de la B.GG. L'Aldea Perdida. Equí podemos velu nuna audición que ficimos nel conservatoriu tocando "Carretera d'Avilés" pa gaita y piano, arreglu de Manuel Avello, con Mª Luz Bonhomme al pianu.



La transcripción fecha por Enol nun inclúi adornos, cosa perfectamente válida. Transcribir los adornos ye un bon exerciciu d'estilu y pue resultar útil en munchos casos,  pero nun ye siempre imprescindible; na música tradicional pue bastar con saber les notes y la midía, siempre cola condición de que deprendamos bien l'estilu del músicu tradicional estudiáu. Un bon mediu pa esto ye la escucha repetida de les grabaciones en cuestión. Ehí vos va, que vos preste. Pasucáis del repertoriu de Julio Álvarez, trescritu por Enol García González.

Descarga la partitura en pdf equí

sábado, 11 de mayo de 2013

Los Pollos, versión de Nemesio Alonso - Trescripción: Inés González

Otra entrada relacionada col capítulu de Camín de Cantares dedicáu a Nemesio Alonso, gaiteru de Torrestío. Como pasa con tolos capítulos del programa y, falando más ampliamente, col 100% del archivu de Xosé Ambás, tolo qu'aparez nél ye interesante. Nun hai desperdiciu. Por eso ye interesante deprender cuanto más meyor, y nel casu de Nemesio los 30 minutos de programa ofrécennos un repertoriu que ye un auténticu tesoru.



Yá trescribiéramos nesti blog la primer jota que toca Nemesio; vamos agora col baille los pollos, que Nemesio toca a partir del minutu 15:00, trescritu por Inés González Suárez. Una pieza pal baile bien interesante y que sigue afitando les característiques del estilo de Nemesio: a) medida precisa, b) afinación perfeuta, c) vibratos suaves, d) trinu del re casi siempre que se pue, e) mordentes col anular izquierdu, pa repetir notes y en xeneral siempre que hai ocasión. 

Inés en clase
Inés ye una gaitera de Llanera. Ta estudiando ESO en Posada y gaita nel Conservatoriu Profesional de Música d’Uviéu. Deprendió a tocar con Pedro Pangua na Escuela Municipal de Música de Llanera, institución de referencia en relación coles enseñances de música n’Asturies. L’afición pola gaita llévala nos xenes: ye descendiente d’Antón de Cogollu, el constructor de gaites más importante na tradición asturiana, enraigonáu nel conceyu Les Regueres.   
Vamos cola trescripción d’Inés.  Que vos preste.
Descárgala con calidá pinchando equí
La pieza en sí, Los Pollos, ye un baille de dos partes que pal occidente d’Asturies suel conocese como cariao o jota encariada. La manera de bailalo pue vese nesti vidiu (segundu 1:;18) espectacular grabáu nel Val.le, en Somiedu, fai bien d’años y subíu a YouTube por Santos Nicolás Aparicio. 


La lletra que canten les cantaores casa perfeutamente cola melodía de Nemesio; el cariao-careáu-pollos ye una pieza perespardía y les versiones nun difieren muncho. Por cierto, nota aparte: Santos tien subíos a YouTube otros munchos vidios impresionantes rellacionaos col baille que tou músicu tradicional asturianu que se precie tien que ver y estudiar. Gracies.

lunes, 6 de mayo de 2013

Jota del repertoriu de Nemesio Alonso (Torrestigu - Babia)

Nemesio Alonso ye un músicu lleonés, vecín de Guisatecha (Oumaña) pero natural de Torrestío/Torrestigu, pueblu babianu al pie de los puertos de La Mesa y Ventana. Toca la gaita asturiana y l'acurdión, y tien un repertoriu impresionante que inclúi jotas, bail.les chanos, rumbas, pasodobles o pollos. Amás de transmitinos la música tradicional de la so zona, Nemesio compón pieces perguapes. Trátase d'un músicu tradicional escepcional, un intérprete con un talentu enorme. 

Nemesio Alonso nel programa "Camín de Cantares", na TPA
Nel programa "Camín de Cantares" dedicáu a Nemesio, programa maxistral como siempre, repásase bona parte del so repertoriu y amás Nemesio y Ambás dan a conocer datos perinteresantes. Recomiendo ver el vidiu enteru (y yá puestos, tolos capítulos de "Camín de Cantares" y "Camín"). Ye interesante por exemplu saber que Torrestigu ye un pueblu lleonés habitáu tradicionalmente por A) vecinos vaqueros que pasaben l'iviernu pa la zona centro d'Asturies (Les Regueres, Llanera, etc.) y por B) vecinos que nun mudaben y pasaben en pueblu tol añu, los "envernizos" como'l propiu Nemesio.

Munchos gaiteros deprendimos de la qu'entamábemos col instrumentu una pieza que vien del repertotiu d'esti gaiteru, conocida universalmente como "Entremediu de Nemesio". La verdá ye qu'el conceptu "entremediu" tien más que ver colo funcional que colo musical. Un entremediu ye, por definición, una piecina que se toca nun momentu determináu de la misa; nun hai unidá musical denguna nes pieces que solemos llamar "entremediu de...". En realidá naide nun nos quita de tocar lo que queramos nesi momentu. Y el casu ye qu'hai tou un batulax de pieces metíes nesi caxón, clasificaes como "entremedios" cuando en realidá son valsiaos, rumbes y hasta pasudobles. Nel casu del "Entremediu" de Nemesio, ye una rumba. Nel programa "Camín de Cantares" insertáu de youtube que tenéis embaxo esto queda bien claro. Insisto y resumo: ye una equivocación llamar entremediu a esa pieza, porque ye una rumba, y el propiu conceptu d'entremediu nun tien entidá musical.

Esti ye'l programa de CDC del que vengo falando, subíu por Belarmino Rodríguez:

Dientro de les muches pieces interesantes que toca Nemesio nesti programa, llamome especialmente l'atención la jota que toca a partir del segundu 10:20. Nun sé si ye tradicional o si ye compuesta por él, porque tien partes bien orixinales. Esta ye la mio transcripción. Podéis descargala en pdf pinchando equí
Jota - Torrestío (Babia), Nemesio Alonso

Nemesio toca con una técnica muy bona, con muncha claridá, y tien rasgos muy distintivos. No que se refier a les ornamentaciones, llama l'atención l'usu que fai del anular de la mano izquierda, nun sólo pa repetir notes sinón tamién pa realzales. La mio transcripción ye probe n'adornos, y yelo aposta. Más que recargar la partitura, prefiero facela clarina y recomendar, eso sí, una escucha atenta de la interpretación del so autor-intérprete. Ye importante asonsañar bien l'estilu d'esti gaiteru, un estilu bien guapu y con munchu interés.

Torrestío / Torrestigu (Babia, Lleón)