jueves, 4 de julio de 2013

La procesión, de Milio'i Fotre - Augüera'i Castañéu, Cangas - Trescripción: Iván Rico

Vamos con otra trescripción d'una pieza que vien d'esi pozu ensin fondu que ye Camín de Cantares, programa estrella de la TPA. Nesti casu, Ambás dedíca-y el programa al gaiteiru Milio'i Fotre (esto ye, d'en Ca'i Fotre), n'Augüera'i Castañéu, nel concechu'i Cangas. Si veis munches veces " 'i " ye simplemente porque ye la contraición de lo que n'otres partes d'Asturies ye la pallabra "de". 

Milio ye un gaiteiru cangués del val.le'l Narcea

Una vez más el programa danos a conocer un gaiteru enforma desconocíu pal gran públicu, pero con un estilu y un repertoriu que son un auténticu tesoru. Vamos fijanos na pieza pala procesión que toca Milio, aproximadamente a partir del minutu 6:00 del vidiu. Son llamatives les paradines que fae na primera parte (compás cinco na trescripción), paradines col fuelle mui característiques de los gaiteros de la zona, y qu'asociamos siempre col míticu Fariñas.


La pieza trescribióla otru de los alumnos de primeru de grau mediu de gaita a los que tuvi la suerte de poner clase nesti cursu 2012/2013: Iván Rico González. Iván ye gaiteru, cantante y pianista. Igual qu'Inés, ye compatriota míu. Los tres somos criaos en Posada Llanera, a orielles del Zalandrón, ultra Naranco et Nora, y entamamos na música na so espléndida Escuela de Música, de la mano de Pedro Pangua.

Iván

Iván ufiértanos una bona trescripción de la procesión de Milio. Paeznos una pieza perguapa y orixinal. Ye solemne pero ensin pasase, y dexa na oreya una sensación tonal un poco indeterminada. Una melodía cortina, pero d'eses a les que se-yos pueden dar milenta vueltes. Que vos preste.


Descarga

lunes, 1 de julio de 2013

Muñeira d'Honorino García, gaiteru d'El Carbu, Sotrondio - Trescripción: Inés González

Norino'l Gaiteru foi un gaiteru tradicional ñacíu n'El Carbu, Sotrondio, en 1917. Pa saber quién foi esti home y la so importancia pa la nuestra tradición musical, podéis pasar un ratín pol blog del mio amigu Raúl García y enteraréisvos.

El discu de Norino editáu pol Muséu del Pueblu d'Asturies
Norino protagonizó un programa de Camín de Cantares, dexando ablucaos a tolos que lo vimos. ¿Yera posible qu'esistiera un gaiteru yá mayor, d'esi nivel y con esi repertoriu, y que la gran mayoría de gaiteros d'Asturies nun supiéremos entá d'elli? Sí, claro que yera posible.Yera Blas Honorino García Fernández, gaiteru escepcional.

Podéis velu nestos dos cortes del programa que subió a youtube l'usuariu Alborecer. Primero escuchamos a Norino tocar la muñeira, y depués la reellaboración fecha pol grupu Tejedor:



Encargué-y la trescripción a Inés González, alumna del conservatoriu a la que conocéis yá de la entrada dedicada a los pollos de Nemesio Alonso. Inés sacó la muñeira d'oreya y fizo una trescripción perbona. Nel primer conciertu d'alumnos que ficimos nel conservatoriu nesti cursu, n'avientu de 2012, tocóla como gaitera solista.

Esti ye'l primer borrador que fizo Inés...

Trescripción d'Inés González

... y  depués informatizámosla. Que vos preste.


Descarga


Descarga