viernes, 5 de diciembre de 2014

miércoles, 26 de noviembre de 2014

Xiringüelu d'Alfredo Dámaso, el gaiteru Llantones (Xixón)

Esti día Fonsu Fernández, director del Muséu de la Gaita, publicó una foto en facebook que me prestó muncho, porque aparte de ser guapa xuncía dos temes que tan d'actualidá nes mios andances como mayestru de gaita. La foto:

El tambor de L'Abadía y el gaiteru Llantones. Col. Muséu del Pueblu d'Asturies.

martes, 18 de noviembre de 2014

Marcha procesional de Julio Álvarez Suárez, deprendía de Nicolás Alonso "El Formigueru" (Uviéu)

El mes de Payares ye mui guapu n'Ayande. Paño castañes. Salgo al monte. Enciérrome en casa al marchar el sol. Fártome de butiel.lu, el primeru de la temporada. Baxo a Cangas a tocar una carrera de montaña (conceptu gaiteiril nuevu, que lo de tocar una boda ta vieyo yá). 

jueves, 9 de octubre de 2014

José Rendueles, gaiteru de Quintueles (Villaviciosa)

Cantiles en Quintueles. Sacao del blog de Quintes.
José Rendueles Rodríguez nació en Quintueles en 1887, fiu de José y Balbina. Casó en Quintueles, con Oliva Varas, y tamién en Quintueles trabayó na so casería de La Rasuca y morrió en 1976.

El famosu cuadru de Pascual Tejerina nel que sal José Rendueles
De nenu gustába-y la gaita, y un vecín regaló-y un punteru. José púnxo-y un fuelle de piel de gatu, curtía por él, y con ella deprendió a tocar. Depués tuvo una gaita de José La Piedra, y yá la última que tuvo compró-yla a la viuda del Busdongu. 

Refalfiar o respigase, that's the question - Prólogu a la próxima entrada del blog

L'otru día tuve xintando col mayestru gaiteru Flavio R. Benito en Nava. La conversación con Flavio ye un placer siempre, y como nun podía ser d'otra manera terminamos falando de la profesión que tenemos en común: enseñar a la xente a tocar la gaita.


lunes, 22 de septiembre de 2014

Lo que me mola y lo que nun me mola

Nun ye nengún secretu: nun me mola usar la gaita pa tocar música clásica. O música de composición nueva qu'imite la estética y les formes de la música clásica. 

Pienso que ye devaluar el nuestru instrumentu. Los músicos clásicos de verdá, los oboístes, clarinetistes o violinistes (que non vigulineros, que ye otra cosa) siempre van miranos con aire de superioridá demientres insistamos en "dignificar" la gaita a base de tocar repertorios que nun son los naturales pa ella. Insisto: La gaita asturiana ye pa tocar música de gaita asturiana, incluyendo l'acompañamientu de la canción asturiana. Y yo añadiría: ¡y punto! 

Dexáime de tocar a Beethoven cola gaita, que nun me presta res.

Gaita de Manuel Álvarez Vega, "Cogollu". Llorgozana, Carreño, h.1900. Sala de gaita asturiana. Museo de la Gaita. Ignacio Acuña. Gijón, 2005.

sábado, 23 de agosto de 2014

El mio tercer gaiteru preferíu

A tol mundo-y gusta facer llistes. Ye un pasatiempu bobu, pero presta. Los diez meyores llibros que lleí, los cinco conciertos meyores nos que tuve... yá m'entendéis. Pasatiempu bobu, pero tamos n'agosto... Ye la serpiente de verano d'encalgaiteiru.

Estes llistuques nun valen pa nada, claro, pero tienen un ciertu valir identitariu: defínennos. Y va poco sorprendime pensando cuáles seríen pa mí los mios gaiteros tradicionales "fetiche". Nun tien munchu sentíu escoyer, yá lo sé; na variedá ta la gracia. Tan toos bien. Pero colo friqui que soi... ¿Un top ten de los mios gaiteros tradicionales favoritos? ¿Por qué non?

Uviéu dende La Bolgachina

martes, 12 de agosto de 2014

Llave pal Si bemol: tocando música de gaita con subtónica

Fai munchu tiempu que tenía gana de poner na gaita una llave que tapare la tronera de detrás, pa consiguir abemolar el Si grave y que fore más una subtónica que una sensible. En términos simples: pa que'l Si salga más grave.

Raúl "Barros" y Llorián con una gaita de José La Piedra
N'Asturies siempre hubo bastante diversidá organolóxica, gaitísticamente falando. Non tanta como en Galicia (mirái sinón el discu de Pablo Carpintero), pero abonda. Por exemplu: dellos constructores, como José La Piedra (nada que ver con Lucía) construíen punteros con un Si (falando en Do, claro) que tiraba claramente al bemol. Una subtónica en toda regla. Otros construíen con un Si que s'axusta bien al conceptu clásicu de "nota sensible". Les de Maquilo yeren distintes a les demás, y les de Galfarro yá pa qué falar... Había muncha diversidá ehí. Muncha riqueza.

Pa escuchar de qué toi falando, ehí vos va un exemplu de gaita con Si abemoláu, con subtónica: toca Gumersindo, gaiteru de Sotu'l Barcu. Grabación de primeros del sieglu XX.



Fai unos treinta o cuarenta años entamaben a trabayar una serie de mayestros gaiteros como Xuacu Amieva, Flavio Benito, Gustavo Eguren, José Ángel Hevia o mio pá, Pedro Pangua. La consigna yera dignificar la gaita y facela "un instrumentu como los demás". Un finxu perimportante pa ellos yera que la gaita pudiera tocar con instrumentos consideraos "cultos", fundamentalmente'l pianu. Y, cómo non, el gran sueñu de que la gaita tocara con orquestes sinfóniques. Yera necesario temperar la escala de la gaita, quitar les peculiaridaes de la so afinación. Eses peculiaridaes delles veces yeren, simplemente, defectos. Pero otres veces non...

Estos gaiteros buscaron la escelencia, y beneficiáronse del trabayu del meyor constructor de gaites de la hestoria d'Asturies: Alberto Fernández Velasco. Alberto temperó la gaita asturiana. Fuera'l Si abemoláu. Fuera la tercera neutra. Munchos punteros en Do natural, envede'l popularísimu Do "brillante". Dixitación nueva na octava alta, con postures separaes pal Si natural y pal Si bemol ("tocar por detrás"). Todo ensin perder el timbre de la gaita, un timbre asturianísimu.Y los gaiteros pudieron (pudimos) tocar acompañaos de pianos, acurdiones, orquestes sinfóniques y lo que fizo falta. Un ésitu, un finxu cimeru de la gaita asturiana.

Berto Varillas cola OSPA. Gaita cromática, escala temperada, afinación "clásica" envede tradicional
Agora tamos en 2014. La mio xeneración ye mui distinta a la de Xuacu, Flavio o Pedro Pangua. Yá crecimos "dignificaos", gracias a ellos, y podemos mirar p'atrás a ver si quedó daqué pel camín. Tamos un poco de vuelta d'orquestes sinfóniques y de dúos de piano y gaita. Refalfiaos. Paeznos que los cánones de la música clásica nun tienen ningún derechu a definir la nuestra música tradicional, y menos tovía a limitala o a "capala". Interésanos la diferencia entre escales temperaes y naturales. Y reconocemos que dientro de lo que yera la gaita tradicional pura, la gaita "enxebre" como dicen los gallegos, había dellos matices y variantes que ye necesario recuperar. Declárome integrista de la gaita tradicional. Más que nada porque nun hai otra, o nun debería.

Unu d'esos matices de los que vos falaba enriba ye'l Si abemoláu. Otru yera la tercera neutra. Estes dos notes rebaxaes respecto a la escala temperada nun son casuales, son casi hasta universales. Ye de llóxica. Si nun tubu de madera faes unos furacos pa tocar por él, lo más natural ye facer tolos furacos iguales. Y lo que consigues entós ye una subtónica y una tercera neutra.

Si tais d'escuchar música de gaita escocesa, sabréis que da una subtónica tanto per baxo como perriba. Podíen habela modificao pa tener una sensible, pero siguieron un camín opuestu al asturianu, el camín d'afondar nes peculiaridaes de la so gaita.

El casu ye que enteréme de que'l mio amigu Santiago González Arenas, luthier de Xixón, tenía fecho una llave de Si bemol... y llamélu, claro. Santiago ye un mui bon constructor d'instrumentos. Fai gaites, flautes traveseres, flautes dulces, inventos varios (todos perinteresantes)... y hasta albokes!

Santiago nel so taller de Castiello Bernueces con una alboka

Y con una flauta. Too fecho por él. 
Encima ye mui bon paisano y tien una virtú que yo envídio-y muncho. Intento deprender esa virtú, y ye que ye un ´señor que siempre que fales con él acabes sintiéndote meyor y más feliz. Ye vital, simpáticu y positivu. Hai xente que tar con ellos quítate vida. Tar con Santi dátela.

La llave ye un mecanismu cenciellu, pero eficaz. Va con una brida y acciónase col deu meñique izquierdu. Fui a por ella a Xixón va unos díes, volví pa la Puela, y hoi estrenéla en condiciones. Equí va l'entremediu de José La Piedra, toquélu pela tarde por tocar daqué del repertoriu d'esi constructor que facía gaites "subtóniques". Veis que nun controlo bien tovía la llave.


Pero el día yá entamara bien. Yá pola mañanina tuviera en Muñalén tomando'l café colos mios amigos Lidia, Cova, Pepín y L.luciano. Llevé la gaita, cola llave de Santiago. Y Pepín, flauteru de Tuenda y de la Bandina'l Tombo, como musicazu y como bon conocedor de la música'l país que ye, sacó petróleo d'ella. Hai que tragalu...  Equí vos lu dexo, tocando la gallegada de Gumersindo,  el gaiteru antiguu mencionáu más arriba.

viernes, 1 de agosto de 2014

Los concursos de gaita (y II)

Vien d'equí. Sigo dando la mio opinión. Diba diciéndovos que los concursos de gaita son nocivos pa la nuestra música tradicional, porque los asturianos somos seres gregarios y cobardonos, y entós los concursos envede dinamizar la escena lo que faen ye fosilizala. Nos concursos hai que facer lo de siempre, lo que fai tol mundu, y el que se mueva nun sal na foto. Pero taba dándovos dellos argumentos individualizaos. Volvamos a ello.


miércoles, 30 de julio de 2014

Tradición gaitera uvieína: Luis Fernández, el gaiteru de Les Maces - Entremediu misa

Fai un tiempín marquéme una entrada na que falaba del background de mio pá, Pedro Pangua. Nella mencionaba al Xarreru de Fitoria y a Luis de Les Maces como dos de los mayestros uvieínos colos que deprendió a tocar el tambor y la gaita, y nel casu del Xarreru tamién a baillar.

El Xarreru (tambor) y Luis de Les Maces (gaita) - Archivu Pedro Pangua

El casu ye que tenía ganes de pasavos una piecina del repertoriu de Luis Fernández, gaiteru de Les Maces. Vamos a ello.

miércoles, 23 de julio de 2014

15000 visites

Nun sé si ye muncho o poco. Pa mí ye muncho, porque ye un blog d'una temática bastante especializada, pienso yo. Y amás con un puntu un poco friki. Y nun voi mentivos, préstame que lleáis esti blog, y si atopáis equí coses que vos valgan, yo encantáu. Un abrazu pa toes y toos. 

Foto subida por Carlos a asturianus.org

viernes, 11 de julio de 2014

Danza peregrina - Ignacio Noriega, el gaiteru de San Roque l'Acebal (Llanes)

Vamos con una pieza mui guapa del repertoriu del gran gaiteru llaniscu Ignacio Noriega, de San Roque l'Acebal, nacíu en 1924 y fallecíu en 2009. Foi un mayestru, el gran nome de la gaita na parte más oriental del país. 

Con Vitorino de Trespalacios al tambor na bolera Vidiagu. Foto sacada del maravillosu blog de Chus Solís
La pieza en cuestión ye'l son de la danza peregrina, danza procesional con palos típica de les fiestes de San Roque. Faise'l día 16 d'agosto, día del santu. La música d'esta danza ye un exemplu de música popular d'aniciu "cultu"; trátase d'una composición relativamente reciente, fecha pa banda música. Igual pasa cola característica jota que tien otru bandu llaniscu, el de la Madalena.

Ye música tradicional, aceptada como tal pola xente, sí; pero una música que, más que venir directamente del pueblu, sal d'un compositor. Poro, tanto la música como'l xeitu de danzala nun se tresmiten como música tradicional oral, sinón a través d'espertos y monitores que dan una instrucción formal a los que van participar na danza. 

Podéis escuchar la versión clásica, pa banda música, nos vidios que vos pongo equí debaxo. Simplificando, podemos decir que son dos frases melódiques, A y B, puentes y modulaciones aparte. Los peregrinos, neños y neñes provistos de palos, van executando delles figures dando saltinos al son de la música.

Si sois un poco folkis, na parte "A" vais reconocer un cachu de melodía col qu'entama el set Chorín el Llagareru, del discu Tierra de Felpeyu. Si, ho, la qu'entama con acurdión sola. Esa primer parte ye mui distinta depués na versión d'Ignacio.

Disfrutái, vamos col NODO:



Otru, 20 años más reciente.



Viva San Roque y el perru!

En Llanes son mui sentíos y mui serios coles sos fiestes y estes dances movilicen munchos sentimientos. Falando más xeneralmente, ye enorme la pasión que tienen los llaniscos pol so patrimoniu cultural tradicional. Bravo por ellos.

Nun vidiu más reciente vemos cómo la banda toca una versión con tres partes, mui guapa tamién. Les dos primeres son mui parecíes y pue dicise que son variaciones y modulaciones d'un mesmu tema. Paez que ye la versión más próxima melódicamente a la d'Ignacio.


Y agora que yá conocemos bien la melodía d'esta danza, escuchamos yá la versión pa gaita, la versión d'Ignacio. L'audio ta sacao del discu "Ignacio Noriega. El gaiteru de San Roque l'Acebal", editáu pol Muséu del Pueblu d'Asturies. Nesti discu Ignacio ta acompañáu al tambor pol escelente músicu Manuel Vela, Manolín el de Poo. Un discu imprescindible pa tolos gaiteros, encamiéntovos a mercalu.

El discu
Tradición viva. Manolín el de Poo ya Ignacio Noriega. Préstame esta foto, espontaneidá a tope.

Pinchái pa escuchar. Dáivos cuenta de cómo Ignacio varía un poco la parte A, cómo la cambia pa da-y un aire muncho más gaitísticu.



Y equí va la mio trescripción. Ye una pieza delicada de trescribir. Ignacio toca dellos compases con un swing a mediu camín ente'l tresillo y los grupos de corchea+dos semicorchees. O lo que ye lo mesmo, a mediu camín ente un 6/8 y un 2/4. Como siempre, les partitures tan llimitaes y nun consiguen espresar bien qué ye lo que fae un bon músicu tradicional. Sobre too si queremos dexar costancia d'adornos. Y sobre too si pretendemos que quede na partitura parte de la riqueza estilística que l'instrumentista va enseñando a lo llargo de varies vueltes a la melodía.

Misión difícil. Imprescindible escuchar. Lleer y tocar tienen que venir siempre depués d'escuchar. Que vos preste.

DESCARGA
La playa Ballota, Llanes

lunes, 7 de julio de 2014

Los concursos de gaita (I)

Voi dedicar unes entraes a decir lo que pienso de... tatachán tatachán... ¡LOS CONCURSOS!

Ye un tema que pienso que tien muncho que ver con esti blog, porque la enseñanza de la gaita y de la música tradicional asturiana en xeneral ta hasta ciertu puntu baxo la influencia de los concursos de gaita. Y pienso que ye una influencia mui negativa. 

miércoles, 18 de junio de 2014

Entrevista con un diplomáu en gaita nuevu

Entrevistina con Fabián Fernández, que ta acabante terminar el grau mediu de gaita. Como soi yo el que-y fice la entrevista, y amás soi el que-y punxe clas de gaita esti añu, supongo que podemos considerala una entrevista burdamente manipulada y controlada, digna d'un Pravda del tiempu de Stalin


jueves, 5 de junio de 2014

Música de ferreiros y gaiteiros de Ferreira

Ayer presenté un par de principios metodolóxicos que bien podíen formar la base d'una opción estética y musical propia. 

Unu yera tocar con coherencia, adecuando la nuestra técnica a la zona d'Asturies de la que venga la pieza que tocamos. Nel casu de facer sets empatando delles pieces, buscamos tamién la coherencia xeográfica y musical, y a ser posible tocamos repertoriu del mesmu valle/conceyu/zona cultural. 

L'otru yera tocar ensin complicaciones técniques innecesaries y gratuites. Lo mismo colos arreglos y la instrumentación. Minimalismu puru. Nun necesitamos muncho pa facer música bona. 

Agora hai qu'aplicalo. Pa ello, viaxamos pa les tierres altes  de la cuenca'l Navia.

www.bedri.es
Vamos tocar dos muliñeiras que garramos del repertoriu de dos grandes músicos ñacíos nun territoriu tresfronterizu: el país conformáu polos conceyos de Fonsagrada, Grandas, Negueira y la parte baxa d'Ibias.


La primera ye una pieza de trompa del repertoriu de Herminio Villaverde, d'A Fonfría, que foi gran responsable de la tresmisión d'esti instrumentu a les xeneraciones presentes y futures.  La segunda ye de Clemente Díaz, gaiteiro natural de Ferreira (Ibias), pero nacíu en Vilauxín (Negueira de Muñiz) y que vive anguaño nel centru d'Asturies. El discu de Clemente editáu pol Muséu del Pueblu d'Asturies ye imprescindible, compráilu yá. 

Ferreira, Ibias

El vidiu ta grabáu impulsivamente  y completamente a lo xo el 27 de mayo de 2014 n'Uviéu. Tengo'l placer de tar acompañáu por Pedro Pangua (trompa y cuchares) y por Marina Pangua (vanu de plásticu). L'arreglu ye improvisáu, punxímonos d'acuerdu sobre la marcha. Esfuerzu y preparación, cero. Nada.

La utilización d'instrumentos "humildes" tien la intención de demostrar que la música tradicional bien fecha nun depende de los medios que se-y pongan. La simplicidá y el conocimientu profundu de la música que se ta tocando son muncho más importantes qu'enfotase nel virtuosismu y la sobrecarga d'instrumentación. 

Ye importante destacar l'usu de la trompa, instrumentu de ferreiros tanto asturianos como gallegos. Toi enamoráu de la trompa, cómo mola. 

Equí vos va'l vidiu: 

Trompa y cuchares: Pedro Pangua
Vanu de plásticu: Marina Pangua
Gaita de plásticu de dixitación "indiferente": Diego Pangua


Y equí van les partitures. Nun vos acostumbréis, porque cada día me convenzo más de que les partitures son na mayoría los casos enemigues del bon facer musical. Asina que meyor nun usales muncho y deprendelo too d'oreya. Veis que nun escribo la ornamentación. Los mis motivos pa nun ponela son los siguientes:

1- Ye más rápido y menos trabayu pa mí.
2- La ornamentación cambia cada vez que tocamos una pieza, o debería cambiar.
3- Limitaría la capacidá del alumnu pa escuchar y memorizar, que son importantísimes.
4- Hai un vidiu. Gracies al vidiu l'alumnu puede asonsañar la mi manera de tocar d'una manera directa.
5- Una partitura ye simplemente UNA FERRAMIENTA. La partitura de la muliñeira de Clemente ye namás eso, una partitura, una representación que tien que servime pa acordame d'ella, como les chuletes de los estudiantes. La manera natural de deprender música tien que ser d'oreya. 

DESCARGA

DESCARGA

miércoles, 4 de junio de 2014

Divagación: Tocar coherente, tocar simple


Dos cosines

1- La importancia de tocar, lo primero, coherente.

Hai que tocar afinao, medío y claro, sí, pero lo primero de too ye tocar... coherente. 

Decide qué vas tocar, y que sea coherente cola tradición. La técnica tien qu'adaptase: nun pues tocar igual una muliñeira d'Ibias y una llixera de la cuenca'l Nalón. Y si ye un amiestu pieces, tien que ser obligatorio facelu con música d'una misma zona xeográfica y cultural. Nun puedo tocar un arroubáu del conceyu Valdés y empatalu col corri-corri. Tampoco puedo meter una alborada en medio d'una jota y una muñera, nun tien sentíu nun contestu tradicional.

miércoles, 28 de mayo de 2014

Los que terminen y los que lleguen nuevos

Fabián Fernández y yo. Fonteta, xineru 2014. Foto: Ambás

Cómo pasa'l tiempu. Yá sal la tercera promoción de graos medios de gaita nel conservatoriu d'Uviéu. Más valientes que completen los seis cursos. Pue ser que-yos quede dalguna pa aprobala en setiembre o que yá te too fecho, pero el casu ye que pal cursu 2014/2015 nun van tener que venir más. Fin de ciclu. Seis años, qué grandes.

miércoles, 14 de mayo de 2014

Rumba - José de Gregorio, gaiteiro d'A Legúa (Ibias)


Os Coutos. Foto d'asturgeographic

Ye mui poco lo que sé de la parroquia d'Os Coutos, n'Ibias. Horros con techu vexetal, montes de cuarcita y techos de pizarra, muncha cultura'l miel, llingua gallega...  Entós meyor callo pa nun meter la pata, pero  eso sí, investigando un minutín atopo blogs interesantes como ye esti Parroquia d'Os Coutos. A ver si sigo deprendiendo coses. Qué grande y qué variao ye Asturies, coime. 

martes, 22 de abril de 2014

Banda de Música de Pravia na TPA

La Banda de Música de Pravia, dirixía por Tino Cuesta, ye la única d'Asturies con seición estable de gaites. Seis gaiteres y gaiteros esperimentaos, una d'elles Araceli, alumna del conservatoriu d'Uviéu, y amás con Marco Antonio Guardado tocando la batería delles veces. Lo bien fecho bien paez. Podéis escuchalos equí (recomiendo saltar la presentación, porque'l showman nun ta mui inspiráu... y cai nel tópicu de querer tocar los instrumentos de percusión, como quien diz "esto tócalo cualquiera").

Gran trabayu, bon empaste, afinación perfeuta.

martes, 15 de abril de 2014

La llixera - Gumersindo, gaiteru de Sotu'l Barcu

Sotu'l Barcu - Fotón de Jacobo Rodríguez
Llevánteste aburríu. Igual nun te presta la semana santa. Nin tar de vacaciones. Cáfiate. Nun ta de playa tovía, pero quedar en casa ye una pena. Abúrreste. Hai que reconocelo, el 76% de los gaiteros somos xente repunante y tristona.

lunes, 24 de marzo de 2014

Entraes nueves nel blog de Chus Solís

L'artesanu Chus Solís tien entraes bien interesantes nel so blog. Esta última temporada subió fotos de gaites antigües y val muncho la pena echa-yos un vistazu. De pasu, si nun conocéis el blog, miráilo too porque ta mui bien. Chus lleva yá tiempu faciendo bona estaya. Tien subío munchos documentos importantes: fotos, artículos, grabaciones históriques, actualidá, etc. Recomendable.

http://asturianbagpipe.wordpress.com/

lunes, 10 de marzo de 2014

Costante, el gaiteiro de Pasarón

*Modificao el 7/4/2014. Ramsés Ilesies apurrióme delles informaciones coreográfiques importantes que tienen que ver cola jota (ver al final d'esta entrada) nesta parte d'Asturies:

Cumu bien dices (la jota) tien dúas partes, pero la estructura ya destinta nesta zona (outra coincidencia cola cultura gal.lega). La jota ta formada por:

1. Una primer parte o "punto" (lo que l.laman "mudanza" n'outras tierras), na que suel haber unos habituales ya outros que se deixan a la improvisación del bail.ladore.
2. Ya outra aú dan vuelta faendo picaos mirando pa la parexa ou se fai "roda" (un corru no qu'el beil.ladore fai picaos ya avanza pal l.lau dereitu).

La primer parte ya la que tien cumu l.letra'l cantar ou cuarteta (Esta es la jotita, jota...). La segunda ya l'estribillu (Antón de María Manuela...).
Polo qu'hai en vídiu veo que Costante entamóu pola segunda parte, recursu mui utilizáu polos gaiteiros de la zona (ente outras cousas pa indicar a la xente la pieza que vei tocar; más ou menos cumu en Centro cuando los gaiteiros entaman colos remates).


Gracies, Ramsés



Asturies ye un país diversu. El cliché ye dicir que ye "un país de contrastes". Contrastes... ¡como tolos países, qué coime! Home, nun sé si Andorra, Groenlandia o Belize son países de contrastes, agora que lo pienso, pero de xuru qu'ellos dicen que sí. El casu ye qu'Asturies sí lo ye. Asturies ye minera o llabraora, cuenquil o mariñana, caliza o pizarrosa, pescadora o vaquera d'alzada, asturfalante o galegofalante, o castellanohablante...

L'Asturies gallegofalante

Y falando del tarrén musical, tamién delles partes d'Asturies queden un poco ocultes a la esperiencia de la mayoría de los gaiteros asturianos, los que vivimos nel mecigayu Xixónuviéuavilés. El mundillo de la gaita espoxiga con Xixónuviéuavilés y les Cuenques como centros neurálxicos, y col apéndice sentimental de Cangues como bierzu de Remis Ovalle. Pero, llamentablemente, la xente sabe poco de la cultura gaitera d'otres partes d'Asturies; tal paez que la música tradicional asturiana ye namás la del centru. Sí, tocamos delles pieces que nun son del centru, que son de "les ales" d'Asturies (espresión de la que repuno tanto como de "comarques"). Pero falta tovía muncho por conocer. Vamos centranos nel occidente d'Asturies.

miércoles, 12 de febrero de 2014

Cronopios gaiteros

¡Esto toi tocándolo mañana! ¡Esto toquélo yá mañana, ye horrible, Miles, toquélo mañana! 
El perseguidor (1959), Julio Cortázar

12 febreru 2014, 30 años ensin Cortázar

Los gaiteros asturianos nun tenemos depresiones cósmiques nin paranoies musicales y esistenciales comparables a les que destrozaron al saxofonista Johnny Carter, personaxe central del cuentu El perseguidor, de Cortázar. Polo menos la mayoría. 

miércoles, 22 de enero de 2014

Jota - Gumersindo, gaiteru de Sotu'l Barcu


JAVI:  Diego, ya sé que pieza quiero trescribir pa esta segunda evaluación.

DIEGO: D'eso nada, ¡home, por Dios! Sólo faltaría. Eso decidirélo yo, chavalín. Pa eso soi el profesor.

JAVI: Home, yo dígote namás que ye una grabación vieya en discu pizarra...



lunes, 13 de enero de 2014

Bucimis

Otra pieza búlgara, igual qu'aquel horo de Smeceno. Nesti casu trátase d'una pieza de la parte de Tracia oriental que paez ser que ye mui conocía.  Yo escuchéla cuando la grabara la banda gaites Cántara, de La Espina, nel so discu Mar de Nubes. Llamárame muncho l'atención, porque d'aquella yera normal que les bandes s'atrevieren colo bretón o lo escocés, pero colo balcánico non.

Cántara entamó a funcionar nel añu 1984 y publicó cuatro discos, que yo sepa: Puerta de occidente, La leyenda de Nonaya, Mar de Nubes y Letía. Foi una de les meyores bandes de gaites qu'hebo n'Asturies.

B.G. Cántara