miércoles, 22 de julio de 2015

El discu

En Ca'l Gaiteiru ye agora un llibru-CD con 180 páxines y 21 pistes. Música tradicional inédita pa gaita y tambor grabada con instrumentos vieyos de distintes partes d'Asturies, y acompañada de 82 partitures que repasen la trayectoria musical de Pedro y Diego Pangua y, de pasu, la variedá de repertorios gaiteros a lo llargo la xeografía asturiana. 


Hai casi cuarenta años que Pedro Pangua empezó a tocar el tambor. Una vida dedicada a la música tradicional asturiana, faciendo de ponte ente los músicos vieyos, los depositarios d’una tradición musical de tresmisión oral, y los músicos nuevos, les más de les veces salíos d’un mediu urbanu. Una ponte construida día a día nes aules de les escueles de música y nos escenarios pisaos dientro y fuera d’Asturies. 

Les vides profesionales de Pedro Pangua y el so fíu Diego resúmense nesi estrabismu permanente: con un güeyu mirando pal patrimoniu heredáu y seleccionando lo que más-yos presta tocar y, col otru calibrando los gustos y necesidaes de los sos alumnos y del públicu «folqui» en xeneral. 

En Ca’l Gaiteiru ye’l frutu natural d’esa vida como intérpretes y profesores: un discu nel que repasen el repertoriu que vienen tocando nos últimos años, acompañáu de 82 partitures, muestra del so trabayu de décades como maestros de gaita y percusión. 



Les pieces que formen el repertoriu de los Pangua llegaron por varies víes. Unes fueron deprendíes directamente de gaiteros tradicionales; otres, de grabaciones de campu feches por folcloristes y otres, simplemente deprendíes d’otros músicos nel día a día d’actuaciones, ensayos y viaxes a lo llargo los años.  

El discu ye una bona muestra del repertoriu actual de Pedro y Diego como parexa de gaita y tambor. Ye un discu purista, que quier recordar a les cintes de cassette mítiques. El formatu nun ye’l mesmu, pero l’espíritu sí: l’emplegu d’instrumentos antiguos y el respetu a la manera de tocar de cada gaiteru y de cada zona son los principios que guíen tol trabayu. 




Prestaría qu’esti trabayu fuere aprovecháu por tolos gaiteros asturianos en dos sentíos distintos. Lo primero, p’ampliar el so repertoriu. Ye innegable que n’Asturies actúa una fuerza centrípeta que lleva a casi tolos intérpretes a centrase nun garrapiellu de pieces consideraes como centrales, básiques y, en dellos casos, normatives. Pero hai muncho más, muncha música por descubrir. L’otru oxetivu ye promocionar la diversidá interpretativa y organolóxica de la gaita asturiana. Nun ye cuestión namás d’incluir nel repertoriu gaitísticu más pieces: ye importante rescatar y valorar la diversidá qu’había hai décades nos patrones de construcción de gaites y na manera de tocales. Nes gaites con tercera neutra y subtónica que facíen dellos constructores del centru’l país y nes gaites de dixitación abierta o semiabierta que s’estilen hoi nes cuenques del Eo y del Navia, por poner dos exemplos, tenemos pistes abondes del trabayu que nos queda por facer a los gaiteros. Si tocamos una pieza tradicional d’una zona d’Asturies determinada, l’oxetivu ideal tien de ser facelo con una gaita que respete el tipu constructivu d’esa zona y emplegar los recursos técnicos típicos del informante que la tocaba. El discu En Ca’l Gaiteiru foi fechu con esa idea en mente.

Afayáivos en Ca’l Gaiteiru. 

PUNTOS DE VENTA: Musical Vila (Uvieo), Librería Paradiso (Xixón), Librería San Andrés (Pola Ayande), y escribiendo a dpangua@gmail.com
 PRÓXIMAMENTE tamién nel taller del facedor de gaites Chus Solís

miércoles, 15 de julio de 2015

Descarga

Fai una bona temporada Chus Solís subió a internet unes grabaciones inédites del gaiteiru cangués José García Tejón, Fariñas, feches nos años 80, que-y pasara en cassette Luis Díaz Santillán, Pito. Les grabaciones son una delicia, y agora que los privilexaos ya les disfrutamos un poco, Chus fízoles públiques EQUÍ

Fariñas colos Son d'Arriba nel Prau del Molín

Les grabaciones dan pa muncho. Son una muestra importantísima de la personalidá gaitística de Cangas y hasta de tol suroccidente'l país. Fariñas toca con munches paradines del soníu del punteru, casi recordándonos a un clarinete o una dulzaina, usa mediu deu pa facer el mi bemol siempre que-y apetez y mete frases de requintu llargues y reviraes. Eses tres característiques marquen el estilu nun sólo de Cangas, sinón de tola zona, incluyendo Ibias, Grandas o A Fonsagrada. 

Pero nun ye sólo la técnica: Fariñas, como sucesor de gaiteiros como Casina'i Courias o Dionisio'i La Riela, yera bon conservador del repertoriu vieyu. Vamos centranos en dos de les pieces que atopáis nel link. Repertoriu cangués a tope.

miércoles, 8 de julio de 2015

Fiscalización


Uvieo. Urbanismu planificáu, banda gaites planificada.
Voi falar d'Uvieo. Nesa ciudá hai una banda gaites que depende del ayuntamientu, y vien recibiendo 290.000 Euros anuales (48.251.940 Ptas.) anuales. Tenéis EQUÍ el presupuestu de 2012, y EQUÍ el de 2013. En dambos casos tenéis que dir a la páxina 34. Nun pongo los presupuestos de 2014 y de 2015 por aburrimientu, pero tan ehí pa miralos. Tenéi en cuenta que nin siquiera ye una escuela de música tradicional, que Uvieo yá tien una que cuesta 375.489,52 euros al añu y que nun tien nada que ver.

290.000 euros ye una cantidá mui respetable. Esa banda tenía que tener una calidá indiscutible, y sacar discos, videoclips y trabayos monográficos a embute. Pero nun ye asina; la so calidá ye discutible y discutida por tolos profesionales del mundillo (en privao, eso sí), y lo que faen ta mui lloñe d'acercase a los llogros artísticos y estéticos d'otres bandes, bandes con munches menos perres. Pa inaugurar aceres y tocar himnos inspiraos por Letizia, valía bien una parexa de gaita y tambor.

¿Pa qué fai falta una banda gaites "pública" que cuesta 290 000 Euros al año, si ta Asturies enllena de bandes que gasten una fracción mínima d'esi presupuestu y que lo faen meyor?