sábado, 24 de septiembre de 2016

Voi abandonar esti blog indefinidamente

Xente, cambióme bastante la vida nestos dos últimos años y nun tengo tiempu pa seguir escribiendo equí. Esti blog queda suspendíu y nun sé si volverá a usase. Foi un placer. Puxa Asturies.

Polca-mazurca ayandesa

Ayande parez que ye un territoriu abundante en mazurques y polques mazurques (ver esti blog y, evidentemente, el llibru En Ca'l Gaiteiru). Son eses pieces pa baillar a lo agarrao con un ritmu ternariu más pesáu que los valses y nel que les frases musicales acentúen el primer tiempu d'un compás y el segundu tiempu (blanca, típicamente) del siguiente. Quedaría una cosa como lo siguiente \\: DUM-ba-ba  dum-BAAAA... DUM-ba-ba   dum-BA-ba   DUM-ba-ba  dum-BAAAA... DUM-ba-ba   dum-BA-ba: //.

 
Vista del distritu de los llagos de Masuria, en Polonia (Polska)

Pues resulta que la mi vecina ayandesa Maricarmita alcuérdase de dos sones que tocaba'l so pariente "El Tuxu", gaiteiru de Penablanca, llugar a 500m de la Puela, un paisanu que morrió a mediaos del sieglu XX. Ún d'estos sones ye una polca-mazurca como una casa (na mio opinión). Tien esa primera parte binaria pero irregular qu'atopamos tamién na polca-mazurca de Rufino Pérez (ver En Ca'l Gaiteiru), na polca-mazurca d'Antón d'Ancadeira (ver discu de los hermanos Hevia, p. ex.), o nes de Santos da Ermita (via Nela) o Alejandro das Nenas. Llama l'atención qu'esti gaiteiru fuera del Palu p'acó, cuando estes pieces atopámosles siempre na zona gallegofalante d'Asturies. Pero claro, teniendo en cuenta que El Tuxu apellidábase Mesa, apellíu que ye mui de la cuenca'l Navia, y que nun ye tan difícil pasar el Palu, pues...

Vista del Navia, empantanáu yá

Diz Ambás qu'estes pieces decíase que yeren "pa coxear", igual polo irregular de la so estructura ritmica, que dificulta enforma garrar el ritmu na parte que ye coxa rítmicamente. Favorez entós los emburriones, la confusión y, polo tanto, el pasalo bien, que ye de lo que se trata. Hai documentos mui bonos d'estos bailles de coxear nel archivu del grupu Xurgar nas Costumes.

Equí tenemos a Maricarmen López cantándonos amablemente la pieza:


Y equí la trescripción, pa los duros d'oreya. Que vos preste.

DESCARGAR